თანამედროვე მედიცინის უმთავრესი გამოწვევა არა მხოლოდ არსებული დაავადებების მკურნალობა, არამედ მათი პრევენცია და ადრეულ ეტაპზე გამოვლენაა. ექიმთან დროული მიმართვა და რეგულარული პროფილაქტიკური შემოწმება, როგორც ბავშვთა, ისე მოზრდილთა ასაკში, ჯანმრთელი და ხანგრძლივი ცხოვრების საფუძველია. ხშირად, მცირე ყურადღებამ ან უსიმპტომო ფაზაში ჩატარებულმა ანალიზმა შესაძლოა ადამიანი მძიმე, ქრონიკული გართულებებისგან იხსნას.
ბავშვთა ასაკში ორგანიზმი დინამიურად ვითარდება, ამიტომ გეგმიურ ვიზიტებს გადამწყვეტი მნიშვნელობა აქვს. პედიატრთან რეგულარული კონტროლი საშუალებას გვაძლევს თვალი ვადევნოთ ბავშვის ფიზიკურ და მენტალურ განვითარებას, დროულად შევამჩნიოთ ზრდაში ჩამორჩენა, ხერხემლის პრობლემები თუ მხედველობის დარღვევები. ადრეულ ასაკში აღმოჩენილი ანომალიების გამოსწორება ბევრად უფრო მარტივი და ეფექტურია.
მოზრდილებში კი პროფილაქტიკური (ე.წ. სკრინინგული) კვლევები მიმართულია ფარულად მიმდინარე დაავადებების გამოსავლენად.
არტერიული ჰიპერტენზია, ონკოლოგიური პათოლოგიები და გულ-სისხლძარღვთა პრობლემები საწყის ეტაპზე ხშირად ყოველგვარი ტკივილის გარეშე ვითარდება. წელიწადში ერთხელ ჩატარებული ოჯახის ექიმთან ვიზიტი, მარტივი სისხლის ანალიზი და ექოსკოპიური კვლევა ამ რისკებს მინიმუმამდე ამცირებს.
ხშირად ორგანიზმი თავად გვაძლევს სიგნალებს, რომლებსაც გადაღლილობას ან სტრესს მივაწერთ, რაც შეცდომაა.
ყურადღება უნდა მიექცეს ისეთ ნიშნებს, როგორიცაა:
• ქრონიკული, აუხსნელი დაღლილობა და შრომისუნარიანობის დაქვეითება;
• წონის მკვეთრი ცვლილება (კლება ან მატება) კვების რაციონის შეცვლის გარეშე;
• ხშირი თავის ტკივილი, თავბრუსხვევა ან არტერიული წნევის მერყეობა;
• მუდმივი წყურვილის შეგრძნება და გახშირებული შარდვა;
• კანის სიმშრალე, თმის ცვენა ან ფრჩხილების მტვრევადობა.
• ძილის დარღვევა, უმიზეზო შფოთვა და გაღიზიანებადობა.
მნიშვნელოვანია: ნებისმიერი ხანგრძლივი სიმპტომი, რომელიც არღვევს ცხოვრების ჩვეულ რიტმს, საჭიროებს სპეციალისტის კონსულტაციას და არა თვითმკურნალობას.
შევეხები ენდოკრინული პათოლოგიების დროულ გამოვლენას,ენდოკრინული სისტემა ორგანიზმის „დირიჟორია“, რომელიც ჰორმონების მეშვეობით მართავს ყველა სასიცოცხლო პროცესს. შესაბამისად, ჰორმონალური დისბალანსი მრავალ ორგანოს აზიანებს. დღეს მსოფლიოში ერთ-ერთი ყველაზე გავრცელებული პრობლემა ფარისებრი ჯირკვლის პათოლოგიები და შაქრიანი დიაბეტია.
ენდოკრინული დარღვევების დროული გამოვლენა ბავშვებში თავიდან აგვაცილებს ზრდისა და სქესობრივი განვითარების შეფერხებას, ასევე ნივთიერებათა ცვლის მოშლას. მშობლებმა ყურადღება უნდა მიაქციონ ბავშვის გადამეტებულ აქტიურობას ან, პირიქით, ლეთარგიასა და სწავლაში ჩამორჩენას.
მოზრდილებში კი, მაგალითად, პრედიაბეტის სტადიაზე გლუკოზის დონისა და გლიკირებული ჰემოგლობინის კონტროლი, პრობლემის აღმოჩენა და ცხოვრების წესის შეცვლა სრულად აჩერებს შაქრიანი დიაბეტის განვითარებას. ფარისებრი ჯირკვლის ფუნქციის დროული კორექცია კი ადამიანს უბრუნებს ენერგიას, აწესრიგებს ემოციურ ფონსა და გულის მუშაობას.
და ბოლოს, ჯანმრთელობაზე ზრუნვა იწყება არა მაშინ, როცა რაღაც გვტკივა, არამედ მაშინ, როცა თავს კარგად ვგრძნობთ. რეგულარული პროფილაქტიკა, ჯანსაღი ცხოვრების წესი და ექიმთან პარტნიორული ურთიერთობა არის ყველაზე მარტივი და ეფექტური გზა ხანგრძლივი, სრულფასოვანი ცხოვრების უზრუნველსაყოფად. ნუ გადადებთ ვიზიტს ხვალისთვის, იზრუნეთ საკუთარ თავსა და საყვარელ ადამიანებზე დღესვე.
სტატიის ავტორი: ოჯახის ექიმი და პედიატრი ანა ბოლღაშვილი
